‘छत्तीसगढ़ी म भागवत कथा’ एक महाकाव्य के रूप म लिखे जात हे ऐला धीरे-धीरे कई भाग म प्रकाशित करे जाही । एला श्रीमद्भागवत अउ सुखसागर आधार ग्रंथ ले के छत्तीसगढ़ी म छंदबद्ध प्रस्तुत करे जाही । भाव अउ कला पक्ष म अपन ध्यान देत सुधार बर अपन सुझाव जरुर देहूं । आज प्रस्तुत हे ऐखर तीसर भाग । ए भाग म पहिली स्कंध के दूसर अध्याय म भगवान के चौबीस अवतार के कथा दे जात हे-
।। श्री गणेशाय नमः ।।
।।श्री परमात्मने नमः।।
पहिली स्कंध
अध्याय-3.
भगवान के चौबीस अवतार
(शिव छंद)
जेन कुछु सरूप हे । श्रीहरिमय रूप हे
रूप घात प्रभु धरे । धर्म सृष्टि मा भरे
धर्म घटय जग जभे । होय प्रकट प्रभु तभे
धर्म एक सार हे । प्रभु के उपकार हे
सनक सनत बंधु बन । पहिली प्रभु धरिस तन
राक्षस हिरणाक्ष् जब । धरती ला हरिस तब
प्रभु सूकर रूप धर । लूट लाय हाथ धर
भगतन उपकार बर । नारद अवतार धर
भक्ति भाव के अलख । भरिस जगत के फलक
नर नरायण ऋषि बन । अड़बड़ तप करिन वन
कपिलदेव धरिस तन । सांख्य योग भरिस मन
दत्त अत्रि सुत बनय । आत्म ज्ञान जग गनय
यज्ञ नाम ला धरे । रूचि सुत बन अवतरे
ऋषभदेव अवतरे । दिव्य ज्ञान जग भरे
पृथु के अवतार धर । जीइन उपचार बर
डूब रहय सृष्टि जब । मीन रूप धरय तब
दैत्य देव मिलय जब । सागर मिल मथय तब
डूब रहय भूमि जब । कछुवा बन आय तब
मथत-मथत एक घा । निकलिस घट अमृत गा
लड़े लगिन सुर-असुर । अमृत लूट असुर फुर
रूप मोहनी धरय । देवन म अमृत भरय
कशिपु पाप करय जब । प्रकटय नरसिंह तब
वामन अवतार धर । काटय बलि के डगर
परसुराम तन धरय । विप्र द्रोह ला हरय
राम रूप जब धरय । कर्म ज्ञान जग भरय
वेदव्यास अवतरे । वेद ज्ञान जग भरे
हलधर अउ कृष्ण बन । हरय भूमि भार तन
बुद्ध रूप जब धरय । धर्म भूमि मा भरय
हंस ग्रीव नाम के । रूप हवय श्याम के
जब कलजुग आचही । कल्कि रूप बाचही
अंश मात्र ये हवय । जेन रूप प्रभु धरय
कृष्ण मात्र एक हे । जे ईश्वर नेक हे
-रमेश चौहान
